今日收到第一個回應呀~~

嘩~~今日收到我個卜既第一個回應呀~!!yeah~!! thx~

今朝公司水靜河飛呀, 大家係度專心工作, 突然間俾隔離公司d舞獅既敲鑼打鼓聲嚇到精神為之一陣~!!果d舞獅團好pro架~!!打到我都煩埋都未走, 真係好慶幸老闆無搵佢地黎呢~!!!

另一方面, 今日係lunch果時係旺角其中一間m記, 遇到一個勁八既m記姐姐, 同個小朋友玩, 仲要查埋人家宅, 明明人地擺明唔答, 仲要係咁問... 不過點衰都衰唔過, 小朋友既家長們, 我一向好少歧視大陸人, 但佢地真係唔得law, 勁冇禮貌呀~自己出街又唔帶錶, 手提又未識用, 問人時間仲要就咁"而家幾點呀?"咁喎, 我好心答佢一次"踏9"la, 點知佢自己搞左一輪電話又問"50幾分話?" shit~!!咩態度呀~仲要質疑我既答案, 係幾分鐘內問2次我都未話佢la~仲要咁既態度, 答完佢之後都覺得自己蠢呀~!!就係咁多lee d大陸人落左黎香港, 先影響咁香港d人~!!! 有時佢地真係唔扺幫架....諗返都好激氣...

希望下次可以遇返d上等人~!!!

今日d電話好旺呀~~~

今日一返工到公司就要準備聽日開會既野, 好彩今日精神好咋, 如果唔係就唔只19:00走la~基本上我上午已經完成了開會要用文件既初稿lu, 下午就執手尾la, 今個下午既電話十個旺呀~首先係九唔答八既同事打黎, 佢竟然話我知佢打錯喎~~搞錯~!!!! 之後就有好少親自打黎既安爺la~~佢平時好忙架, 佢打黎問我做咩唔send sms或打俾佢拜年呀~~之後我即刻補返, 然後佢就話將封利是放係公司等我自己去拎...原來佢特登打黎封利是俾我架~~好窩心呀~!!多謝佢呀~!! 跟住就有做了police既丁池打黎, 佢特登同我傾計架, 佢地平時好忙同埋好少打黎既~所以今日收到佢地d電話都特別開心, 之後連平時好少係辦公時間內打黎既波波都打黎喎, 真好旺呀~~令到原本無咩特別樹既下午都開心係黎~~good呀~~!!!^^

太歲誕誕誕誕誕呀~~

雖然尋日一早訓左, 但今日係差唔多11點先起身, 少有地咁訓得~!!!打點左一切之後, 我地就三人行去拜太歲~~去到荃灣果個小巴站就知弊了~~有幾可會見到小巴站打蛇餅~?????為表誠意我地足足等了差唔多一個鐘車, 烈日當空, 真係唔野少, 我地一路等車, 一路研究拜太歲既步驟, 熟讀後都可以變專家~!!等我記下先~如果係豬, 猴, 蛇, 虎既就要注意la~~<一> 先將祭品於放斗姥元君, 當年太歲(今年24號)及自己出生所屬之太歲(祭品要放單數架~!!)真係唔講唔知, 原來扣除斗姥元君, 即係太歲中既大大佬, 係有60個太歲架, 而太歲係用出生年份黎分既~!!! <二>於斗姥元君放3支香, <三>於當年太歲24號放3支香, <四>於自己出生所屬之太歲放3支香及3支長壽香, <五>跟住要同其他太歲先生say hello la, 由1-60號太歲各放1支香(最好由1號開始), <六>返回自己出生所屬之太歲前, 取出"壽金"放於太歲腳旁, 此稱"攝太歲", 意思是攝高運氣呀~!!!記得攝多d~!! <七>取出太歲衣, 百解, 太歲符於自己出生所屬之太歲前祈福, <八>最後將太歲衣及百解化掉, 而"太歲符"則取出不用化掉, 放在身旁保平安, 留待年尾還神才化掉~!!!
由於今日係太歲誕, 人流勁多加上太多步驟, 簡直就好似打仗咁呀~!!之後我地仲去左拜太婆, 太公同六舅公呀~!!!完成哂成個過程都三點幾了~~仲要排返隊落去, 然後我地就去左西九龍食野, 跟住去左附近買玩具俾小布林呀~!!
行程緊密, 搭車回家中都昏睡過去了~~回到家再試下開電腦, 真係激死人呀, 慢到呀~!而家既一日卜, 都已經係不斷hang機導致既第n個版本~!!! 而家又準備再睡了~~~

24 Feb 07 - 休息半天

今天一早起身返工之前, 就先要到車公廟和四面佛拜神先, lee個係我地一家新年必做既事情之一, 然後就返工了, 雖然lee個真正既返工日只係尋日o者, 但由於實在有d累和又到了星期六的關係, 所以一返工作心情都沒有, 雖然明知如果今日唔好好工作, 下個禮拜會冇好日子過, 但都忍唔住要睡一陣!!
好不容易, 終於都捱到放工, 今日約了我的katherine行街, 雖然明明話個只會window shopping, 但少有地一行就有所斬獲, 我買左條手鏈俾阿妹呀, 間唔中都要氹下佢開心既~!!本來以為買完條鏈應該可以收手, 荷包可以安全著家架la, 點知係我地搵洗手間的時候, 咁arm撞返之前我成日"幫趁"果間舖頭又開返la, 係d咁值得高興的情況底下, 又破費了, 荷包都乾塘了....
回到家可能因為太累的關係, 差點暈了, 所以食完個飯, bath完就唔理三七二十一去睡覺了, 我記得係大約19:30o者, 訓到大約22:00我終於有返d知覺, 原本諗住打返個卜先再訓既, 點知個電腦又係物似主人形咁, 開極都開唔到, 試左幾次之後冇佢咁好氣, 又再訓過lu~~~

正式開工大吉

hahaha~今日終於都返到黎自己公司啦~!!雖然今日係公司既第一日開工, 但"0"新聞氣氛law~仲要一返到去成枱都係都係工作, 同我交托俾同事d利是成強烈反比, 果個"好"同事呀~只係拎左幾封返黎敷衍我咋, 不過其實d同事好好, 見唔到我個人, 都叫個同事拎俾我, 好感動呀thank you~~仲有我盆"草頭寶寶"(我親愛的老闆鍾意咁叫)因為放假期間嚴重缺水, 已經變左禾桿草咁既色了...唔知仲有冇得救呢!! 我用左一個上午黎清理我枱上既工作, 順帶一提, 期中有封信, 我同事寫錯到破左我做咁耐野既紀錄, 由頭到尾都要改, 我仲已為我做緊以前學打字果d功課, 真係嘆為觀止!!(有機會我好想post上黎做紀念...
食完飯之後改埋果封嘆為觀止的信, 3點幾都老闆一齊過紅磡公司, 雖然可以唔駛俾錢搭車, 但佢沿路上既話題, 真係擋唔住呀~!!!返到公司又可以收多封利是..真高興~!!我仲拎返之前公司annual dinner d相返黎tim呀, 我諗我都應該係全晚影得最多相果頭幾名了, 因為我唔知幾時俾人推左去做頒奬小姐呀~!!!

做完哂我想做既事之後, 提早左半個鐘頭收工, 可以補返尋日返多左果d呀~真好~!!!之後落左尖沙咀搞d野, 7點鐘返屋企了~!!!
p.s. 真黑仔呀~!!!搭火車返去果時arm arm撞著部壞既售票機, 阻住哂~!!!

天空係咩色?

lee 2日對我來說天空是灰色或黑色既, 因為當我返到公司既時候, 天先arm arm光, 但放工既時候天就黑齊了, 唔知係咪其實lee2天本身就係陰天呢~~??

在E & M頂更的第二天

嘩~返埋今日機電署就可以返返去旺角了, 真開心, 今日又係一大早咁起身, 不過由於時間關係, 尋晚臨訓既時候已決定今日唔要同自己"整色整水", so d時間可以鬆動d, 可能因為之前放假睡眠充足呀, 所以都未死得, 咁arm又適逢小布林要食奶奶, 等佢食完之後, 竟然仲有雅興同佢影相同玩~hahaha, 真係覺得自己好厲害!!!經過尋晚既教訓, 我今日特登帶本書返黎睇呀~我諗都應該可以大派用場la掛~!!
嘩~頭先lunch買野食果時真係激死人la...我呀~已經吸取左尋日冇人開門既教訓, 問埋人借咭架la, 都唔知lee(emsd) 度d lift個system咩構造, 竟然有其中2部層層都去just唔去我要果層, 第一次上返去俾果個"好心"阿sir話果部lift唔上, 叫我上多層落返去, 佢又唔係唔知成層樓幾咁大,三尖八角, 上面人影都冇個, 搵唔到條樓梯bor, so搭返第二部睇下可唔可以撞彩有得去我既目的地(雖然預左冇), 答案都係冇既, so我就係5樓出la, 因為去左地下出去轉lift太樣衰la...點知一出5樓除左冇人之外...仲要熄左燈tim...人地怕黑架ma~!!! 好衰唔衰又撞返冇得上返去既果部lift, so最後都係死死地落左去最低果層轉lift, 買野食o者, 都要十個難度九個"click"既....好彩我返埋今日lee邊o者...如果唔係實俾人笑死la...
今日返夜晚個阿嬋早左到真係好~可以早dd收工
放工既時候係九龍灣逛左陣, 買左d野俾自己, 唉~我都係連張信用咭都放係屋企好d... 總括lee2日emsd得益: 利是(滿意), 熊貓眼同胃痛, 真係唔知點報答好... 所以打後既心情------灰!!!!

豬初一至豬初三的節目

HaHaHa~原本諗住用下午既時間好好咁幫我個新blog扮靚靚~不過因為唔係自己屋企所以整完d基本野之後, 都係決定留返第時慢慢加落去... lee個moment update下豬年頭三日既節目la~!!

初一
11點幾起身之後就開始食早餐加午飯la~之後開始裝身...好衰架~d天氣忽然暖左咁多, 搞到唔知著咩好~!!不過我一於少理, 照原定計劃著返去阿業婚宴既黑色連身裙, 好彩阿業結婚果日既天氣同年初一差唔多咋, 不過到諗件外套既時侯就頭都痛埋...因為一條裙其實arm arm好既, 但條裙太sexy la (個背"隻"), so點都都要著d野係面, 原本想著背心既, 但後面竟然著左件半長袖...長袖加長袖, oh~~我既耐熱程度就黎可以比"美"駱駝...chu man man都係著短袖加中袖咋, 我地幾極端~!!之後自己化埋個粧, 新年流流原本想用d紅紅地既顏色既, 但最衰自己冇預備, so都係化粧裡面既唯有一隻eye shadow - 珍豬色. 搞定哂之後, 小布林終於黎la~~雖然只係冇見一日, 但都好似好耐冇見咁, lee d咪叫<一日不見, 如隔三秋囉>, 我地黎完個熱情既抱抱, 影埋相同逗完老姊同jeff既第一封大利是後, 終於出發la~去到婆婆度~d人都散左差唔多一半lu, 小布林當然好搶啦, 當佢再次踏出門口既時侯, 咪就係謝左一半囉. 初一除左去婆婆屋企外, 十姨婆的家都係近年必到既~!我都好冧去佢果度架, 因為佢整野十級好味~就算食左飯去都見到d野食都一定食得落既~!!就見就睇下小布林用埋佢所剩無幾既力量去同d小朋友影相, 然後走返去酒樓了~今日真係好lucky呀~我一直搵左好耐既nds扭蛋筆, 妤妤幫我抽(但冇左個蓋...), 之後發現yuki多左個蓋~而且好開心架la, 點知轉頭yuki仲帶左我地去自己抽tim呀~~開心死呀~!!!最後當然返去好好咁利用支筆筆黎同佢地2個yuki & ka wai決一勝負啦!!

初二
同樣十一點幾起身, 就去左敦豪同二姨同表表飲茶, 今日佢地象徵式咁黎拜年~!!!嘩~好日都唔見間酒樓可以咁水靜河飛呀~d waiter少有d服務周到, 媽媽俾左封利是佢之後, d服務態度勁過劉華呀~(果個moment), 就係咁樣飲下, hea下就飲到3-4點度, 我地仲plan左4-5月同二姨佢地去泰國tim呀~十萬個期待~!!!yeah, yeah, yeah~!!! 臨走果時咁arm咁約左夜晚睇<<門徒>>~!!所以返到屋企休息左一陣, 食埋個便飯我地又再出個去鑽石山啦, 睇完戲返屋企果時都撞arm d人拜完年返屋企, 超多人呀~好彩走左部車之後果架都仲有位坐~!!! 套門徒又幾好睇喎~都係katherine講到咁恐佈, 等我入場之前仲驚緊會唔會訓著tim, 主腳全部都靚仔靚女!!! 返到屋企, 食埋個甜品 - 燉蛋就zzz la~~明天仲有節目~!!!

初三
同頭兩日一樣11點幾就係身la, 話咁快又係最後一日假期lalee~幾日日日都訓到咁晏, 明天就知味道了~!!~以前唔太鍾意放長假既, 因為怕悶囉, 冇野做ma, 但近期開始嫌少了~唔知係咪人老左, 諗野唔同左呢~!!! 起身如常地擾攘一輪後, 捧住1抽同1袋捨得出門口la~轉左2程車去二姨 - 西貢的家後, 已經有d頭暈暈la~~定一定神之後, 就同左ka wai & friend, kit man and chu man man去左匡湖居"見識"下喎~~唔知係因為新年關係定豪宅關係呢...好冷清啊so好快就見識完啦, 跟住我地仲好左車公廟一躺, 適逢今日係車公誕呀~~我地竟然咁有誠意地去到山car la既車公廟真係好神心呀~~!!(明明自己屋企隔離都有), and then我地接埋ka ki表表就返去繼續我地既餘慶活動nds大賽!! 我, ka wai & friend真係勢均力敵呀~~!!之後就係咁樣係二姨的家過了我一年一年度的年初三, 臨尾仲去左老姊的家逗多左好幾封利是...真係唔好意思既...!因為小布林返我地lee邊的家, 所以特別早走, 返到屋企仲做緊電視劇, 雖然咁早返到去, 但完完全全冇提早到我既zzz時間, 真差勁...!!!

豬年的第四天

唉~~~今日係豬年既第一個工作天...心情好矛盾, 因為原本lee個moment我可能同小布林玩緊架ma...無見幾日, 一見我就要返工, 仲要返朝8晚6tim...諗起今日5點45起身同張床黏在一起既苦況...
不過好在今日返到黎d"收獲"都比預期中理想, 人生路不熟咁, 有得收已經偷笑la~我黎過咁多次都唔太滿意我個位既...因為我坐既房好似課室咁, 全部同一個方向既...而我就坐係中間果排第一個, 邊個入黎都走唔出我既視線, 正因為咁...d人唔好意思唔派利是俾我...一d未見過既都俾我然後走左去囉, 都幾好笑...不過當然都有d當住我面俾我隔離果個既, 仲要係我個contract既阿sir!! 哼~今年佢睇d場有咩冬瓜豆腐唔好求我!!!
好在今日既工作量唔多, 除左聽電話之外, 就係上網la~睇下報紙呀, 十年都無開過既e-mail呀~~同埋人地d blog咁囉...正因為見到人地d blog咁好睇...(我連3唔識7果d都睇埋), 同埋今年係自己既年呀~ 所以咪開返個囉(見只係過左4日, d記憶仲係到)~可以下個豬年睇返既時候可以回味一下啦....所以我要好好俾心機日日上黎寫...(我次次開blog既時候都係咁講既...) 希望今次堅成功la~yeah~~~而家係下午2時正....希望快d放工返公司布置下我的新blog, 同埋同小布林培養返d感情...佢應該開始認人la, 要好好咁等佢記下我...佢同佢媽媽一樣咁冇記性就慘了~~
由朝早8點等到6點放工, 一出門口既心情真係難以用筆墨黎形容呀~~聽日帶本書去睇下先...唔好講少
返到屋企見到小布林真係冧死, 雖然好累, 但我一返到去就氹佢覺覺豬啦~~